Kryetari i Degës së Bashkimi Demokratik për Integrim në Tetovë, Bajram Rexhepi, ka publikuar një mesazh të gjatë drejtuar mërgimtarëve që po kthehen për pushime në vendlindje, ku ngre akuza të ashpra ndaj qeverisjes aktuale lokale dhe qendrore, duke e përshkruar situatën në Tetovë dhe në vend si një “realitet të hidhur”.
Në reagimin e tij, Rexhepi shprehet se gjatë dy viteve të fundit shumë procese, sipas tij, kanë shkuar prapa, duke përmendur heqjen e tabelave në gjuhën shqipe, ndryshimet e emërtimeve të rrugëve, shitjen e pronave publike, problemet me parkingjet, menaxhimin e mbeturinave, furnizimin me ujë, gjelbërimin dhe funksionimin e administratës.
Ai pretendon se mërgimtarët do të përballen me një sërë problemesh sapo të hyjnë në vend, ndërsa kritikon edhe gjendjen në shëndetësi, infrastrukturë dhe urbanizëm, duke akuzuar pushtetin për keqmenaxhim dhe dëmtim të interesit publik.
Në fund të mesazhit, Rexhepi pranon se edhe BDI-ja, sipas tij, mban përgjegjësi për disa punë të papërfunduara dhe gabime të së kaluarës, por thekson se “kthim prapa si ky që po ndodh sot nuk ka qenë asnjëherë”.
