Gjatë 24 orëve të fundit janë raportuar disa raste të dhunës në familje në qytete të ndryshme të vendit, ndërsa policia ka ndërmarrë masa për zbardhjen e tyre.
Në Manastir, më 16 prill rreth orës 16:00, policia ka privuar nga liria një 43-vjeçar me iniciale G.B., i cili dyshohet se fizikisht e ka sulmuar nënën e tij.
Ndërkohë, në Kumanovë, një grua 65-vjeçare ka denoncuar se për një periudhë më të gjatë kohore është keqtrajtuar psikikisht nga djali i saj 35-vjeçar, i cili sipas saj është sjellë në mënyrë agresive.
Një tjetër rast është raportuar në rajonin e Strugës, ku një grua 56-vjeçare ka denoncuar partnerin e saj për dhunë fizike dhe psikike të vazhdueshme. Sipas denoncimit, ai e ka dëbuar nga shtëpia dhe i ka marrë çelësat e banesës.
Raste të ngjashme janë regjistruar edhe në Shkup. Një grua 59-vjeçare ka raportuar se ish-bashkëshorti i saj 65-vjeçar ka bërë kërcënime ndaj saj dhe djalit të tyre, ndërsa një 48-vjeçare ka denoncuar kërcënime telefonike nga ish-partneri i saj ndaj saj dhe familjes.
Nga Ministria e Punëve të Brendshme bëjnë të ditur se po ndërmerren masa për zbardhjen e plotë të rasteve dhe se pas dokumentimit të tyre do të parashtrohen kallëzime përkatëse kundër autorëve.
