Reperi amerikan Kanye West pritet të ngjitet sonte në skenë në Tiranë, në një koncert që ka nxitur debat të madh jo vetëm në Shqipëri, por edhe në mediat ndërkombëtare. Qeveria shqiptare ka pranuar se ka ndarë rreth 4 milionë euro nga fondi rezervë i shtetit për të mbështetur organizimin e koncertit, një vendim që ka shkaktuar reagime të forta nga opozita, artistë dhe qytetarë. Sipas qeverisë, financimi është bërë për të garantuar zhvillimin e aktivitetit dhe përfitimet që priten për turizmin.
Koncerti ka rikthyer në vëmendje edhe deklaratat e mëparshme të Kanye West, i cili është përballur me kritika të ashpra pasi ka bërë komente publike që lavdëronin Adolf Hitlerin dhe ka përdorur simbolikë naziste. Për shkak të këtyre qëndrimeve, ai është përballur me anulime dhe kufizime të performancave në disa vende evropiane, ndërsa shumë organizatorë kanë refuzuar ta ftojnë për koncerte. Pavarësisht polemikave, koncerti në Tiranë do të zhvillohet sonte, ndërsa debati për përdorimin e fondeve publike dhe përzgjedhjen e artistit vazhdon të dominojë opinionin publik.
