Kryeministri izraelit Benjamin Netanyahu mbajti sot një fjalim të ashpër në Debatin e Përgjithshëm të Kombeve të Bashkuara, duke mbrojtur veprimet e Izraelit në Lindjen e Mesme, pavarësisht protestave jashtë ndërtesës dhe largimit të diplomatëve nga salla. Netanyahu mbrojti sulmet ndaj objekteve bërthamore të Iranit, duke i cilësuar ato si një vendim të vështirë, por të domosdoshëm për sigurinë e Izraelit. “Shkatërrimi i objekteve bërthamore të Iranit ishte i vështirë. Ishte shumë i vështirë”, deklaroi ai.
“Por për mua, ishte një nga vendimet më të lehta që kam marrë ndonjëherë si kryeministër, sepse nëse nuk do ta kishim bërë, të gjithë do të kishim vdekur”, shtoi ai.
Deklaratat e tij u bënë pavarësisht raportit vjetor të deklasifikuar të shërbimeve amerikane të zbulimit, sipas të cilit nuk kishte shenja për një vendim politik të Iranit për të prodhuar një bombë bërthamore. “Izraeli nuk ka kryer gjenocid. Izraeli ka parandaluar gjenocidin”, tha ai, duke këmbëngulur se, nëse nuk do të ishte parandaluar nga Izraeli, Hamasi “do të kishte vrarë çdo të fundit prej nesh”.
