Një valë e fortë polare ka goditur Zelandën e Re, duke sjellë reshje bore edhe në zonat e ulëta, duke mbyllur shumë rrugë dhe shkolla, si dhe duke shkaktuar ndërprerje serioze në shërbimet e trageteve. Sipas “New Zealand Herald”, bora ka mbuluar pjesë të Ishullit Jugor, ndërsa sistemi i ftohtë i motit është përhapur në të gjithë vendin. Policia u ka bërë thirrje banorëve të qytetit jugor Dunedin që të shmangin çdo udhëtim të panevojshëm për shkak të borës dhe rrugëve të ngrira.
Janë lëshuar paralajmërime për reshje bore në disa rrugë kryesore. Stuhia ka ndikuar edhe në procesin mësimor. Të gjitha shkollat fillore, të mesme dhe kopshtet në Dunedin, si dhe në zonat ndërmjet Mosgiel, Port Chalmers dhe Waikouaiti, janë mbyllur. Është mbyllur gjithashtu edhe shkolla e mesme “East Otago” në Palmerston.
