Kryetari i Gjykata Kushtetuese dhe gjyqtarët kushtetues, në seancën e fundit, me shumicë votash kanë miratuar një vendim që nga 1 tetori të marrin paga më të larta.
Në kushtet kur ende nuk ekziston një ligj i veçantë për Gjykatën Kushtetuese, gjyqtarët vendosën të shfuqizojnë ndryshimet në Ligjin për pagat dhe kompensimet e tjera të personave të zgjedhur dhe të emëruar në shtet, me të cilat ishin ulur koeficientët për llogaritjen e pagave të funksionarëve.
Konkretisht, Gjykata ka shfuqizuar pjesë të nenit 14 që i referohen kryetarit të Gjykatës Kushtetuese dhe pjesë të nenit 15 që kanë të bëjnë me gjyqtarët kushtetues. Me hyrjen në fuqi të këtij vendimi më 1 tetor 2026, pagat e kryetarit dhe të gjyqtarëve do të llogariten sipas ndryshimeve ligjore të miratuara në vitin 2024.
Në vendimin e publikuar më 17 qershor thuhet:
“Shfuqizohen neni 14 në pjesën ‘kryetar i Gjykatës Kushtetuese të Republikës së Maqedonisë’ dhe neni 15 në pjesën ‘gjyqtar i Gjykatës Kushtetuese të Republikës së Maqedonisë’ nga Ligji për pagat dhe kompensimet e tjera të personave të zgjedhur dhe të emëruar në Republikën e Maqedonisë. Këto dispozita pushojnë së vlejturi më 1 tetor 2026. Pas këtij afati, për llogaritjen e pagave të kryetarit dhe gjyqtarëve të Gjykatës Kushtetuese do të zbatohet ligji i ndryshuar deri në rregullimin e kësaj çështjeje me një ligj të veçantë.”
Vendimi pritet të shkaktojë debat publik, pasi vjen në një periudhë kur çështja e pagave të funksionarëve mbetet temë e ndjeshme në opinion.
