Ministri i Drejtësisë, Jeton Shasivari, ka pritur sot ushtruesen e detyrës së shefes së Misionit në Ambasadën e ShBA-së, Nicole Varns, me të cilën ka diskutuar për reformat në drejtësi, sundimin e ligjit, digjitalizimin, legjislacionin penal dhe luftën kundër korrupsionit.
Gjatë takimit, Shasivari theksoi se ka kërkuar mbështetje amerikane për avancimin e legjislacionit penal përmes shkëmbimit të përvojave dhe angazhimit të ekspertëve juridikë.
“Nga diplomatja amerikane kërkova që në periudhën e ardhshme të mundësohet shkëmbimi i përvojave dhe ofrimi i ndihmës nga ekspertë juridikë të ShBA-së në fushën e legjislacionit penal”, ka shkruar Shasivari.
Ai shtoi se e ka falënderuar diplomaten amerikane për mbështetjen e vazhdueshme të ShBA-së, ndërsa të dy palët kanë shprehur gatishmërinë për thellimin e bashkëpunimit përmes ekspertizës dhe projekteve të përbashkëta në fushën e drejtësisë.
