Revolucion kundër tullacëve? Shkencëtarët zhvillojnë një xhel që stimulon rritjen e flokëve

Shkencëtarët mund të jenë pranë një zbulimi të rëndësishëm në trajtimin e tullacisë, pasi kanë zhvilluar një xhel të thjeshtë me bazë sheqeri, i cili në testet e para laboratorike ka treguar efekt të fortë në rritjen e flokëve.
Studimi është fokusuar te deoksiriboza – një sheqer natyral që gjendet në ADN. Fillimisht, ajo është studiuar për ndikimin në shërimin e plagëve, por gjatë eksperimenteve është vërejtur një efekt i papritur: rritje e shpejtë dhe e dukshme e flokëve të rinj.
Në kushte të kontrolluara laboratorike, xheli ka treguar deri në 90% sukses te minjtë meshkuj me tullaci të shkaktuar nga hormonet, duke stimuluar rritjen e flokëve të dendur dhe të shëndetshëm. Rezultatet janë krahasuar me efektin e Minoxidil, një nga trajtimet më të njohura për rënien e flokëve.
Sipas studiuesve, mekanizmi i veprimit lidhet me përmirësimin e qarkullimit të gjakut drejt folikulave të flokëve. Kjo ndihmon në aktivizimin e rrënjëve “të fjetura” dhe nxit krijimin e enëve të reja të gjakut, një faktor kyç për rritjen e flokëve.
Ky trajtim mund të përfaqësojë një alternativë më të sigurt ndaj terapive ekzistuese si Finasteride, të cilat shpesh shoqërohen me efekte anësore dhe nuk janë të përshtatshme për të gjithë pacientët. Për më tepër, xheli është i biodegradueshëm dhe jo toksik, duke e bërë potencialisht të përshtatshëm për përdorim më të gjerë.
Megjithatë, ekspertët theksojnë se rezultatet janë ende në fazë të hershme dhe kërkohen teste te njerëzit për të konfirmuar efektivitetin edhe jashtë laboratorit.
Nëse këto rezultate konfirmohen, ky xhel i thjeshtë mund të shndërrohet në një nga inovacionet më të mëdha në luftën kundër alopecisë androgjenike, një problem që prek miliona njerëz në mbarë botën.