Një konflikt i dhunshëm në fshatin Pirok të Tetovës ka përfunduar me arrestimin e një 54-vjeçari, i cili dyshohet se sulmoi një bashkëfshatar dhe tentoi ta godiste me mjet të mprehtë, ndërsa familja e viktimës u kërcënua që të mos e denonconte rastin.
Sipas SPB Tetovë, më 27 korrik në orën 12:20, zyrtarët policorë nga Stacioni Policor Kamjan arrestuan K.A. (54) nga Piroku, nën dyshimin për veprën penale “rrezikim me mjet të rrezikshëm gjatë përleshjes ose fjalosjes”.
Ngjarja ishte denoncuar rreth dy orë më herët nga R.S. (43), i cili deklaroi se në lokalin e tij, pas një debati të shkurtër, ishte sulmuar fizikisht nga K.A., i cili më pas kishte tentuar ta godiste edhe me një mjet të mprehtë.
Sipas denoncimit, gjatë kohës që po raportonte rastin në polici, djali i të dyshuarit kishte shkuar dy herë në shtëpinë e R.S. dhe kishte kërcënuar familjarët e tij që të mos e paraqisnin rastin.
I dyshuari është ndaluar në stacionin policor, ndërsa pas dokumentimit të plotë të rastit do të ngrihet parashtresa përkatëse.
