Një 47-vjeçar nga Tetova ka denoncuar në polici se është mashtruar për 20.000 denarë, pasi ka rënë pre e një mesazhi të rremë lidhur me një rezervim të supozuar të një banese në Shkup.
Sipas SPB Tetovë, më 9 qershor në ora 13:30, ai ka raportuar se më 6 qershor kishte pranuar një mesazh përmes një platforme online në lidhje me një pagesë të pretenduar për rezervimin e një banese.
Pasi kishte hapur lidhjen (linkun) e dërguar dhe kishte futur të dhënat e kartelës së tij bankare, nga llogaria i janë tërhequr 20.000 denarë.
Dyshimet se bëhej fjalë për mashtrim u shtuan kur personi me të cilin komunikonte i kërkoi edhe 25.000 denarë shtesë.
Tetovari kontaktoi menjëherë bankën e tij, pas së cilës kartela u bllokua.
Policia njofton se po ndërmerren masa për zbardhjen e plotë të rastit dhe identifikimin e autorit të mashtrimit.
