SPB Strugë ka paraqitur kallëzim penal kundër H.M. (50) dhe N.K. (54), të dy nga fshati Veleshtë i Strugës, si dhe kundër një subjekti juridik nga fshati i njëjtë, për shkak të dyshimit të bazuar se kanë kryer veprat penale “Uzurpim i patundshmërive”, “Eksploatim i paligjshëm i lëndëve të para minerale”, “Shkaktim i rrezikut gjatë punimeve ndërtimore” dhe “Ndotje e ujit të pijshëm”.
Personat e kallëzuar, në disa parcela kadastrale në pronësi të tyre dhe të personave të tjerë, si dhe në disa parcela në pronësi shtetërore, kanë kryer gërmime dhe eksploatim të paligjshëm të lëndëve të para minerale, pa pasur kontratë të vlefshme për koncesion.
Gërmimet e paligjshme i kanë kryer në afërsi të drejtpërdrejtë të burimeve të ujit në fshatin Shum të Strugës, prej nga qyteti i Strugës furnizohet me ujë të pijshëm, me çka kanë kontribuar në ndotjen dhe turbullimin e drejtpërdrejtë të ujit të pijshëm me mbi 30 herë më shumë nga niveli i lejuar.
Në këtë mënyrë, kanë shkaktuar ndërprerje për një kohë më të gjatë të furnizimit me ujë, si dhe ndalim të përdorimit të ujit për pije, mirëmbajtjen e higjienës personale dhe higjienën e duarve.
