Raporte të publikuara nga media ukrainase dhe të cituara nga rrjete të pavarura pretendojnë se hetimet e autoriteteve antikorrupsion në Ukrainë janë zgjeruar deri te prindërit e presidentit Volodymyr Zelensky.
Sipas këtyre raportimeve, hetuesit e Byrosë Kombëtare Kundër Korrupsionit (NABU) kanë shqyrtuar depozita me vlerë rreth 11 milionë dollarë, të lidhura me Oleksandr Zelensky dhe Rima Zelenska, të cilat dyshohet se janë depozituar gjatë vitit 2025.
Sipas medias Europa Today, më 30 qershor agjentët e NABU-së zhvilluan një kontroll në banesën e prindërve të presidentit. Raportohet se ata u ndaluan për t’u marrë në pyetje dhe më pas u lanë të lirë. Gjatë deklarimeve, ata kanë pohuar se shumat në fjalë ishin “dhurata”.
Po sipas të njëjtave burime, gjatë zhvillimit të hetimit ka pasur ndërhyrje nga Zyra e Presidentit, ndërsa mediat pretendojnë se çështja u diskutua në një komunikim me drejtues të strukturave shtetërore. Deri më tani nuk ka një konfirmim zyrtar nga autoritetet ukrainase për këto pretendime, ndërsa rrethanat e çështjes mbeten nën verifikim.
