Skena politike shqiptare në Maqedoninë e Veriut po merr zhvillime të reja, pasi ish-ministri dhe një nga figurat e VLEN-it, Fatmir Limani, është parë sot në Kërçovë në shoqërinë e liderit të BDI-së, Ali Ahmeti, shkruan Tema.mk.
Paraqitja e tyre së bashku vjen vetëm pak kohë pasi Limani u përjashtua nga VLEN-i dhe u shkarkua nga posti i ministrit, duke nxitur spekulime se ai po rikthehet sërish në kampin politik të dajës së tij, Ali Ahmetit. Fotografitë dhe pamjet e publikuara nga Kërçova kanë ngjallur reagime të shumta në opinion, pasi marrëdhëniet mes Ahmetit dhe Limanit kanë kaluar nëpër periudha tensionesh politike gjatë viteve të fundit. Megjithatë, paraqitja e përbashkët po interpretohet nga shumëkush si një sinjal i afrimit dhe bashkëpunimit të mundshëm politik mes tyre.
Ende nuk ka ndonjë deklaratë zyrtare nga Fatmir Limani apo nga BDI lidhur me pozicionimin e tij të ardhshëm politik, por zhvillimet e fundit po shtojnë zërat se ai mund të jetë pjesë e strukturave të BDI-së në periudhën që vjen./Tema.mk
