Drejtori i Spitalit Klinik në Tetovë, Erzen Elezi, priti në një takim zyrtar ministrin e Ekologjisë, Muhamet Hoxha, së bashku me ekipin e tij, ku në fokus ishte modernizimi i sistemit të ngrohjes në këtë institucion shëndetësor.
Gjatë takimit u diskutua mundësia e zëvendësimit të sistemit ekzistues me naftë me një sistem më modern dhe më miqësor ndaj mjedisit, të bazuar në gaz natyror. Ky projekt synon uljen e ndotjes së ajrit përmes reduktimit të emetimeve të dëmshme dhe përmirësimin e cilësisë së ajrit në Tetovë.
Ministri Hoxha theksoi se përmirësimi i cilësisë së ajrit mbetet prioritet, duke nënvizuar se projekte të tilla ndikojnë drejtpërdrejt në uljen e ndotjes dhe avancimin e standardeve mjedisore. Sipas tij, përdorimi i gazit si alternativë më ekologjike do të ketë ndikim pozitiv në një qytet që vazhdimisht përballet me sfida në këtë drejtim.
Nga ana tjetër, drejtori Elezi vuri në dukje nevojën urgjente për këtë investim, duke theksuar se sistemi aktual me naftë është i amortizuar, më i kushtueshëm dhe me ndikim negativ në mjedis. Ai shprehu gatishmërinë për bashkëpunim institucional për realizimin e projektit.
Në përfundim, palët u dakorduan për ndërmarrjen e hapave konkretë në fazat e ardhshme, me qëllim zbatimin e sistemit të ri të ngrohjes dhe përmirësimin e cilësisë së ajrit në Tetovë.
Lajmi ditës
Plan për modernizimin e ngrohjes në Spitalin e Tetovës: Drejt kalimit nga nafta në gaz natyror
