Ministria e Brendshme njoftoi se njësia mobile ndaloi dhe gjobiti një shofer autobusi i cili kishte frena të dëmtuara dhe po transportonte 85 fëmijë, 37 pasagjerë më shumë se sa lejohej.
Sot (03.04.2026) në orën 07:45 në bulevardin “Boris Trajkovski” në Shkup, oficerë policie nga Njësia Mobile për Siguri në Komunikacionin Rrugor pranë Sektorit për Çështje Komunikacioni kryen kontroll të një autobusi me targa të Shkupit, në pronësi të një personi juridik nga Shkupi, i cili kryen transport publik pasagjerësh (transportim i organizuar i fëmijëve), dhe u konstatua se në të po transportoheshin 85 pasagjerë, ndërsa maksimumi i lejuar me lejen e trafikut është 48 pasagjerë, përkatësisht shoferi J.D. (63) nga Shkupi, po transportonte 37 pasagjerë (fëmijë) më shumë se sa lejohej në autobus“, tha Ministria e Brendshme.
“Automjeti iu nënshtrua një kontrolli të jashtëzakonshëm teknik në një stacion të autorizuar për kontroll teknik nga ekspertë, gjatë të cilit u përcaktua një defekt teknik i automjetit, përkatësisht një defekt në pajisjet e frenimit (forca e frenimit të frenit të punës dhe frenit ndihmës) dhe pajisjet që lejojnë dukshmëri normale (xhami i përparmë i thyer). Kundër personit juridik, një personi përgjegjës në personin juridik dhe shoferit J.D. (63) nga Shkupi janë marrë masa përkatëse dhe ata do të përballen me sanksionet e përcaktuara me ligj, ndërsa automjeti është përjashtuar nga trafiku deri në eliminimin e mangësive“, shtoi policia, duke u apeluar të gjithë pjesëmarrësve në trafik që të respektojnë rregullat dhe rregulloret e trafikut.
