Gazetari maqedonas Zoran Bozinovski ka publikuar pretendime tronditëse lidhur me tragjedinë në Bogdanci, ku raportohet për vrasjen e një vajze 17-vjeçare dhe vetëvrasjen e personit të dyshuar, përcjellë Tema.mk.
Sipas aludimeve të Bozinovskit, ngjarja ka ndodhur rreth orës 19:30, kur personi i identifikuar prej tij si Simo Guntarov dyshohet se e kishte mbyllur të miturën në një veturë, e kishte mbytur dhe më pas i kishte vënë flakën automjetit. Pas kësaj, ai dyshohet se kishte kryer vetëvrasje me varje.
Bozinovski ngre gjithashtu dyshime se motivi i mundshëm ishte dashuria e pakthyer dhe pretendon se vajza kishte kërkuar ndihmë disa herë, duke iu drejtuar institucioneve përkatëse, por thirrjet e saj nuk ishin marrë parasysh.Deri më tani, këto pretendime të gazetarit nuk duhet të konsiderohen si fakte të konfirmuara zyrtarisht. Mbetet të shihet se çfarë do të bëjnë të ditur institucionet kompetente lidhur me rrethanat e kësaj tragjedie.
