Turqia ka kërkuar lëshimin e një njoftimi të kuq nga Interpoli për kryeministrin izraelit Benjamin Netanyahu, në kuadër të hetimeve mbi ndalimin nga Izraeli të një flotiljeje me ndihma humanitare që ishte nisur drejt Gazës.Lajmin e bëri të ditur ministri turk i Drejtësisë, Akin Gürlek.
Në një deklaratë, ai tha se Ministria e Drejtësisë i kishte kërkuar Ministrisë së Brendshme të niste procedurat për njoftime të kuqe ndaj Netanyahut dhe Afek Moskovitch, të cilin e përshkroi si një zyrtar të sigurisë izraelite.Një njoftim i kuq i Interpolit është një kërkesë drejtuar autoriteteve ligjzbatuese në mbarë botën për gjetjen dhe arrestimin e përkohshëm të një personi të kërkuar nga një shtet ose gjykatë ndërkombëtare, zakonisht në pritje të procedurave të ekstradimit.Sipas Gürlek, në Gjykatën e 11-të të Krimeve të Rënda në Stamboll vijojnë procedurat gjyqësore ndaj 35 të pandehurve, mes tyre Netanyahu dhe Moskovitch, lidhur me ndalimin e flotiljes në ujërat ndërkombëtare.Turqia kishte lëshuar muajin e kaluar urdhërarreste për Netanyahun dhe zyrtarë të tjerë të lartë izraelitë, duke i akuzuar për gjenocid në lidhje me operacionet ushtarake të Izraelit në Gaza.
