Të dhënat më të fundit të Entit Shtetëror të Statistikave (ESHS) tregojnë se gjatë vitit 2025 janë regjistruar 546 persona të vdekur nga shkaqe të dhunshme, një rritje prej 6.8 për qind krahasuar me vitin paraprak.
Vdekjet e dhunshme vazhdojnë të mbeten një nga treguesit më shqetësues të sigurisë dhe shëndetit publik në Maqedoninë e Veriut. Të dhënat më të fundit të Entit Shtetëror të Statistikave (ESHS) tregojnë se gjatë vitit 2025 janë regjistruar 546 persona të vdekur nga shkaqe të dhunshme, një rritje prej 6.8 për qind krahasuar me vitin paraprak. Pas këtyre shifrave fshihen aksidente rrugore, vetëvrasje, vrasje dhe ngjarje të tjera tragjike që jo rrallë kanë nxjerrë në pah edhe dobësi serioze të institucioneve përgjegjëse, përcjell gazeta KOHA.
Sipas statistikave, vdekjet e dhunshme përbëjnë 2.7 për qind të mortalitetit të përgjithshëm në vend. Meshkujt vazhdojnë të jenë viktimat më të shpeshta, duke përbërë 68.5 për qind të rasteve, ndërsa gratë 31.5 për qind. Në strukturën e përgjithshme dominojnë aksidentet me 82.2 për qind të rasteve, të ndjekura nga vetëvrasjet me 14.8 për qind dhe vrasjet me 2.9 për qind. Brenda kategorisë së aksidenteve, pjesën më të madhe e zënë vdekjet e shkaktuara nga dëmtime të tjera të rastësishme, ndërsa te vetëvrasjet forma më e shpeshtë mbetet varja, strangulimi dhe asfiksimi. Te vrasjet dominojnë rastet e shkaktuara nga përdorimi i armëve të zjarrit.
