Studentët, pedagogët dhe Partia Demokratike kanë njoftuar protesta për të shtunën, më 24 tetor, ndërsa biznesi i vogël ka bërë thirrje për mbylljen e dyqaneve dhe pjesëmarrje në tubime. Pas 11 ditësh protestash, kërkesa për dorëheqjen e Edi Ramës ka dalë në plan të parë, ndërsa sindikata e universiteteve ka shpallur bojkotin e mësimit…
Tirana përgatitet për një tjetër ditë protestash, këtë herë me pjesëmarrjen e paralajmëruar të studentëve nga qytete të ndryshme, pedagogëve, përfaqësuesve të biznesit të vogël dhe opozitës. E shtuna, 24 tetor, vjen pas protestave që nisën më 13 tetor për kushtet në universitete dhe që më pas u shndërruan në tubime kundër qeverisë së Edi Ramës.
Organizatorët kanë njoftuar grumbullime në orare dhe vende të ndryshme, ndërsa mbetet e paqartë nëse të gjitha grupimet do të bashkohen në një protestë të vetme.
