Tetovari për 100 euro bëri skandal në shtëpi dhe kërcënoi me thikë nënën dhe bashkëshorten – Prokuroria kërkon paraburgim

Prokuroria Themelore Publike e Tetovës ka nisur procedurë dhe ka propozuar masën e paraburgimit për një banor të fshatit Gajre, i dyshuar për veprat penale “Rrezikim i sigurisë” dhe “Lëndim trupor”.
Sipas Prokurorisë, më 21 qershor, gjatë ushtrimit të dhunës në familje, i dyshuari fillimisht u ka kërkuar 100 euro nënës dhe bashkëshortes së tij, por pasi ato refuzuan t’ia japin paratë, ai ka filluar të shkatërrojë orenditë e shtëpisë dhe me thikë i ka kërcënuar se do t’i vrasë.
Gjithashtu, ai dyshohet se ka ushtruar dhunë fizike ndaj bashkëshortes, duke e goditur me grushte dhe duke e tërhequr për flokësh, me ç’rast i ka shkaktuar lëndime trupore.
Duke vlerësuar se janë plotësuar kushtet ligjore, prokurori publik ka dorëzuar propozim deri te gjyqtari i procedurës paraprake për caktimin e masës së paraburgimit.