Të gjitha shpenzimet gjyqësore për shtatë vitet e procesit për rastin “Talir 2” do të duhet t’i mbulojë shteti, pasi Gjykata e Apelit konfirmoi aktgjykimin lirues për ish-kryeministrin
Kjo nënkupton se nga buxheti i shtetit do të paguhen edhe shpenzimet për avokatët e Gruevskit dhe të partisë VMRO-DPMNE, si dhe shpenzimet e tjera të procedurës gjyqësore.
Seanca e parë gjyqësore për këtë rast u mbajt në gusht të vitit 2019, ndërsa vendimi përfundimtar është marrë shtatë vjet më vonë.
Aktakuza kishte të bënte me ndërtimin e paligjshëm të selisë së partisë VMRO-DPMNE, të njohur si “Pallati i Bardhë”.
Pas aktgjykimit të parë dënues, Gjykata e Apelit e ktheu rastin në rigjykim. Më pas, Gjykata Penale në Shkup dha një aktgjykim lirues, i cili tashmë është konfirmuar edhe nga gjykata e shkallës së dytë.
Sipas arsyetimit të Apelit, veprimet e të akuzuarit N.G., si person përgjegjës në subjektin juridik, kanë qenë brenda kompetencave të tij. Gjykata vlerësoi gjithashtu se Prokuroria Themelore Publike në Shkup nuk kishte paraqitur prova se veprimet e tij ishin në kundërshtim me Ligjin për financimin e partive politike.
