Qeveria e Maqedonisë së Veriut ka miratuar një vendim për ndryshimin e mënyrës së llogaritjes dhe uljen e akcizës për benzinën dhe dizelin, me qëllim zbutjen e rritjes së çmimeve të derivateve të naftës në vend, përcjell INA.
Sipas autoriteteve ekzekutive, ky hap ndërmerret për të mbrojtur standardin jetësor të qytetarëve dhe ekonominë vendi, në një periudhë kur kuotimet e naftës së papërpunuar në tregjet ndërkombëtare shënojnë rritje të lartë. Qeveria bëri me dije se po ndjek nga afër lëvizjet ditore të çmimeve për të ndërmarrë ndërhyrje të shpejta.
Me zbatimin e kësaj mase, ndikimi i shtrenjtimit te konsumatori final do të jetë më i ulët. Sipas përllogaritjeve zyrtare, pa uljen e akcizës çmimi i benzinës do të rritej me rreth 4 denarë për litër, ndërsa tani pritet një rritje prej rreth 3 denarësh. Te dizeli, amortizimi është edhe më i ndjeshëm: në vend të një rritjeje të parashikuar prej 8 denarësh për litër, shtrenjtimi pritet të jetë rreth 6 denarë.
Vendimi i ri i kalon tashmë Komisionit Rregullator për Energjetikë, i cili pritet të zyrtarizojë çmimet e reja me pakicë, ku do të pasqyrohet efektet e kësaj mase mbrojtëse.(INA)
