Disa orë pasi pothuajse çdo zyrtar tjetër izraelit foli për memorandumin e mirëkuptimit midis SHBA-së dhe Iranit, kryeministri Benjamin Netanyahu ka reaguar. Netanyahu tha se ai dhe presidenti Donald Trump nuk bien gjithmonë dakord.
Në një konferencë për shtyp të hënën në mbrëmje, Netanyahu tha se ai është përgjegjës për interesat e sigurisë së Izraelit dhe se kjo duhet të bëhet me mençuri.
“Me ose pa një marrëveshje, Irani nuk do të ketë armë bërthamore, as sot dhe as nesër. Për sa kohë që unë jam kryeministër i Izraelit, kjo nuk do të ndodhë”, tha ai.
Sipas tij, lufta nuk ka mbaruar dhe se do të duhet të mbeten vigjilentë, të fortë dhe të vendosur për të mbrojtur veten, sipas nevojës.
Netanyahu e bëri të qartë gjithashtu se Izraeli nuk ka ndërmend të tërhiqet nga Libani jugor, Gaza apo Siria. “
Ne do të qëndrojmë në zonat e sigurisë për aq kohë sa të jetë e nevojshme për të mbrojtur vendin tonë”, tha ai.
Duke iu përgjigjur pyetjeve të gazetarëve, Netanyahu pranoi pasigurinë rreth marrëveshjes.
“Ende nuk e dimë se çfarë do të jetë marrëveshja”, tha ai.
I pyetur nëse marrëveshja u arrit kundër qëndrimit të tij, Netanyahu theksoi marrëdhënien e tij të gjatë me Trumpin.
“Të vepruarit me mençuri kërkon shumë përvojë dhe njohuri të thella me arenën amerikane. Besoj se po e bëj këtë në mënyrën më të mirë të mundshme”, tha ai.
