Kryetari i Tearcë, Daut Memishi, ka deklaruar se komuna është në pritje të një përgjigjeje pozitive për hapjen e çerdhes së re, pas përmirësimit të të gjitha vërejtjeve të mëparshme, shkruan Tema.mk. Ai theksoi se gjatë tre muajve të fundit janë adresuar të gjitha mangësitë e evidentuara, duke rritur besimin se këtë herë procesi do të përmbyllet me sukses.
“Kemi pasur disa vërejtje nga e kaluara të cilat neve na është dashur kohë për këto tre muaj që t’i përmirësojmë dhe besoj që kjo do jetë e treta dhe e vërteta. Besoj fuqishëm që këtë radhë nuk do të kthehet negativ, pasi të gjitha ato vërejtje i kemi marrë, i kemi përmirësuar dhe besoj që ditëve në vijim do kemi përgjigje pozitive dhe menjëherë do fillojmë me procedurat e rregullta që do duhet të shpallet konkursi dhe më pas të nisë të funksionalizohet”, deklaroi Memishi.
Sipas tij, nëse merret drita jeshile nga institucionet përkatëse, komuna do të nisë menjëherë procedurat administrative, duke përfshirë shpalljen e konkursit dhe funksionalizimin e çerdhes, e cila pritet të lehtësojë ndjeshëm nevojat e familjeve në këtë zonë./Tema.mk/
