Një rast i rëndë i dhunës në familje në Shkup ka çuar një vajzë 15-vjeçare në tentativë për vetëvrasje, pasi nuk ka mundur më të përballojë kërcënimet dhe presionin e vazhdueshëm nga babai i saj.
Sipas informacioneve, i dyshuari 56-vjeçar për një periudhë të gjatë kohore ka ushtruar dhunë psikologjike dhe fizike ndaj bashkëshortes dhe dy fëmijëve të tyre, të moshës 18 dhe 15 vjeç. Edhe pse ai vazhdimisht shfaqte sjellje agresive, familjarët nuk e kishin denoncuar nga frika.
Pikërisht kërcënimet, fyerjet dhe presioni i vazhdueshëm e shtynë vajzën 15-vjeçare drejt këtij veprimi të dëshpëruar.
Prokuroria Themelore Publike e Shkupit ka nisur menjëherë procedurë kundër babait të dhunshëm për veprën penale “rrezikim i sigurisë” sipas nenit 144 të Kodit Penal dhe ka propozuar masa të rrepta kujdesi.
Prokurori publik ka kërkuar ndalimin e largimit nga vendbanimi, detyrimin për paraqitje të rregullt në gjykatë, konfiskimin e dokumenteve të udhëtimit, si dhe ndalim të afrimit dhe kontaktit me viktimat.
Sipas njoftimit të prokurorisë, familja kishte jetuar për vite me radhë nën frikë nga sjellja agresive e të dyshuarit, ndërsa rasti u bë i njohur pasi vajza e mitur tentoi t’i japë fund jetës së saj.
