Komuna e Tearcës ka nisur sot një aksion të gjerë për pastrimin e kanaleve në të gjithë territorin e komunës, pasi është konstatuar se një numër i madh i tyre janë bllokuar nga mbeturinat e hedhura në mënyrë të papërgjegjshme.
Sipas autoriteteve komunale, gjatë inspektimeve në terren është vërejtur se në shumë raste kanalet janë zënë qëllimisht për interesa personale, duke shkaktuar probleme dhe pengesa për banorët e zonës.
Qëllimi i aksionit është përmirësimi i rrjedhës së ujërave, mbrojtja e mjedisit dhe parandalimi i problemeve që mund të shkaktohen nga bllokimi i kanaleve.
Nga Komuna e Tearcës u bëhet thirrje qytetarëve që mbeturinat t’i hedhin vetëm në vendet e parapara për këtë qëllim dhe të kontribuojnë në ruajtjen e pastërtisë së ambientit. Njëkohësisht, komuna njofton se inspektorati komunal do të jetë vazhdimisht në terren dhe ndaj çdo personi që kapet duke hedhur mbeturina në vende të palejuara do të ndërmerren masa ligjore, ndërsa rastet do të procedohen te organet kompetente.
“Ruajtja e ambientit është përgjegjësi e përbashkët. Vetëm me bashkëpunim mund të kemi një komunë më të pastër dhe më të sigurt për të gjithë”, thuhet në njoftimin e Komunës së Tearcës.
https://www.facebook.com/share/p/195DTYjLUF
