Shoqëria financiare për kredi të shpejta “Kredi Yes” është kompania të cilës Ministria e Financave i ka hequr licencën e punës pas konstatimit të parregullsive serioze në veprimtarinë e saj.
Bëhet fjalë për një nga kompanitë më të mëdha në tregun maqedonas të kredive të shpejta, me strukturë pronësie të lidhur me investitorë nga Bullgaria. Pas vendimit për heqjen e licencës, kompania ka nisur mbylljen e rreth 40 degëve në mbarë vendin.
Sipas informacioneve të publikuara, rreth 120 punonjës janë njoftuar se aktiviteti i kompanisë është ndërprerë, duke ngritur pikëpyetje për statusin e tyre të ardhshëm të punësimit.
Edhe pse i është hequr licenca, “Kredi Yes” do të mund të vazhdojë vetëm me aktivitete të kufizuara për mbledhjen e borxheve ekzistuese nga klientët, por nuk do të lejohet të japë kredi të reja apo të kryejë veprimtari financiare që kërkojnë licencë. Kompania operon në Maqedoninë e Veriut që nga viti 2019 dhe është shndërruar në një nga aktorët më të rëndësishëm në sektorin e kredive të shpejta. Sipas të dhënave financiare, gjatë vitit të kaluar ka realizuar të ardhura prej rreth 4 milionë eurosh, ndërsa fitimi ka arritur në rreth 1,15 milionë euro.
Ministria e Financave njoftoi se licenca është hequr pas një kontrolli të jashtëzakonshëm të nisur mbi bazën e një ankese të paraqitur nga një qytetar. Gjatë inspektimit janë konstatuar shkelje serioze të detyrimeve ligjore, mosrespektim i rregullave për mbrojtjen e konsumatorëve dhe praktika që, sipas Ministrisë, kanë vënë drejtpërdrejt në rrezik qytetarët që përdorin shërbimet financiare.
