Kryetari i Komunës së Tearcës, Daut Memishi, priti në takim përfaqësuesit e RUMELİSİAD nga Turqia

Kryetari i Komunës së Tearcës, Daut Memishi, ka mirëpritur sot në një takim zyrtar përfaqësuesit e RUMELİSİAD nga Turqia, me të cilët ka zhvilluar bisedime rreth mundësive për investime në komunë.
Gjatë takimit është diskutuar për potencialet që ofron Komuna e Tearcës, mundësitë e bashkëpunimit ekonomik dhe krijimin e kushteve të favorshme për investitorët. Sipas Memishit, qëllimi është të tërhiqen investime të reja që do të ndikojnë në zhvillimin ekonomik të komunës, hapjen e vendeve të reja të punës dhe përmirësimin e mirëqenies së qytetarëve.
Kryetari Memishi theksoi se Komuna e Tearcës mbetet e përkushtuar në ndërtimin e partneriteteve me investitorë dhe organizata serioze, duke krijuar mundësi të reja zhvillimi dhe bashkëpunimi në interes të qytetarëve.