Zëdhënesi i Gardës Revolucionare Iraniane, Ali Mohamed Naini, ka sfiduar drejtpërdrejt presidentin amerikan Donald Trump pas deklaratave të tij se forcat amerikane kanë shkatërruar kapacitetet ushtarake të Iranit.
“Nëse Trumpi vërtet pretendon se ka shkatërruar marinën tonë, le të hyjë në Ngushticën e Hormuzit dhe në Gjirin Persik, nëse ka guxim”, tha zëdhënësi.
IRGC është një organizatë ushtarake elitare e formuar pas Revolucionit Islamik, e cila vepron paralelisht me ushtrinë e rregullt iraniane dhe ka një rol të rëndësishëm në mbrojtjen e regjimit, si dhe në operacionet iraniane jashtë vendit.
SHBA-të e konsiderojnë këtë organizatë si terroriste, ndërsa ndikimi i saj shtrihet edhe në politikën dhe ekonominë e vendit.
Në ditët e fundit, Trump ka pretenduar vazhdimisht se sulmet amerikane dhe izraelite kanë paralizuar praninë ushtarake iraniane, duke përfshirë marinën dhe forcën ajrore, ndërsa raketat dhe dronët janë shkatërruar.
