Kryeministri i Shqipërisë, Edi Rama, ka publikuar një reagim të detajuar në rrjetet sociale lidhur me projektet e investimeve në Ishullin e Sazanit dhe në zonën e Zvërnecit, vetëm pak minuta përpara nisjes së protestës qytetare në Tiranë kundër projektit të parashikuar në Zvërnec, e cila hyn në ditën e saj të 15-të.
Në një status të gjatë me titull “Fakte jashtë kanaleve të turbullta të internetit ose një pasqyrë për të gjithë përgojuesit e shtetit shqiptar”, Rama ka sqaruar se Ishulli i Sazanit mbetet pronë shtetërore dhe se nuk është menduar apo kërkuar ndonjëherë për shitje.
Sipas kreut të qeverisë, modeli i parashikuar për zhvillimin turistik të ishullit bazohet në pjesëmarrjen e shtetit shqiptar në investim, ndërsa negociatat me investitorët vijojnë ende dhe nuk ka një marrëveshje përfundimtare. Ai thekson se investitorët nuk kanë paraqitur ende projektin arkitektonik dhe studimin përkatës mjedisor.
