Kryeministri izraelit Benjamin Netanyahu tha se Izraeli nuk e ka pranuar planin e mbështetur nga Shtetet e Bashkuara për Gazën, edhe pasi mori garanci se tërheqja izraelite nga territori palestinez nuk do të ndodhë derisa Hamasi të çarmatoset plotësisht.
Në një video të postuar gjatë natës në mediat sociale, Netanyahu tha se ekipi i Donald Trump besonte se mund të arrinte çarmatimin e Hamasit dhe demilitarizimin e Gazës.
“Ne po e shqyrtojmë këtë mundësi. Ata na dërguan një plan, të cilin ne nuk e kemi pranuar, nuk është plani ynë. Ne ua kemi përcjellë komentet tona atyre”, tha ai.
Netanyahu u takua të hënën, me “Këshillin e Paqes” të Trump, i cili është i ngarkuar me zbatimin e fazës së dytë të planit të paqes për Gazën, dhe mori garanci sipas të cilave ushtria izraelite nuk duhet të braktisë pozicionet që mban aktualisht në Rripin e Gazës, 60% të territorit të të cilit kontrollon, deri pas çarmatimit të plotë të lëvizjes islamiste palestineze.
Hamasi, nga ana e tij, tha të premten se pranon një marrëveshje të shpallur nga Donald Trump dhe që kryesisht parashikon, sipas versionit të saj të bërë publik në atë kohë nga “Këshilli i Paqes”, fundin e operacioneve ushtarake të të dy palëve në Gaza dhe çarmatimin e lëvizjes islamiste palestineze në kombinim me një tërheqje graduale të Izraelit.
Kryeministri izraelit, i cili po kërkon një mandat të ri në zgjedhjet e ardhshme parlamentare në tetor, është nën presion nga aleatët e tij të ekstremit të djathtë brenda koalicionit qeveritar, të cilët e kanë denoncuar këtë marrëveshje dhe po bëjnë thirrje për një votim brenda qeverisë për ta hedhur poshtë atë.
