Lideri suprem i Iranit bën thirrje për hakmarrje pas vrasjes së Khameneit
Lideri suprem i Iranit, Ajatollah Mojtaba Khamenei, ka bërë thirrje për hakmarrje pas vrasjes së babait të tij dhe paraardhësit në këtë post, Ali Khamenei.
Në një deklaratë me shkrim, të lexuar në televizionin shtetëror, ai tha se hakmarrja është “vullneti i kombit”, në mesazhin e tij të parë publik që nga fillimi i ceremonive mortore për babanë e tij.
Ali Khamenei u vra në një sulm ajror më 28 shkurt, në ditën e parë të luftës mes SHBA-së, Izraelit dhe Iranit.
“Ne zotohemi të hakmerremi për gjakun e liderit martir dhe të gjithë martirëve të këtyre dy luftërave nga vrasësit kriminelë dhe të turpëruar”, thuhet në deklaratën e Mojtaba Khameneit.
Ai shtoi se “kjo çështje nuk varet as nga ekzistenca ime personale dhe as nga ajo e zyrtarëve të tjerë. Pavarësisht nëse jemi apo jo të pranishëm, ajo do të ndodhë”.
Deklarata vjen pasi gjatë ceremonive mortore të Ali Khameneit janë dëgjuar thirrje për vrasjen e presidentit amerikan Donald Trump. Ky i fundit të shtunën paralajmëroi se çdo plan i tillë do të sillte një përgjigje të ashpër nga SHBA-ja.
Sipas mediave amerikane, Izraeli i ka ndarë Uashingtonit informacione të inteligjencës se Irani kishte hartuar një plan për atentat ndaj Trumpit, ndërsa presidenti amerikan ka mohuar se bëhet fjalë për një plan të ri.
