Kryeministri Hristijan Mickoski njoftoi se të hënën pritet të nënshkruhet kontrata me kontraktuesin për ndërtimin e pjesës së dytë të autostradës Shkup-Bllacë, përcjell TV21. Mickoski tha se pret që punët në këtë aks rrugor të nisin gjatë këtij muaji.
“E gjithë procedura ka përfunduar me sukses. Është zgjedhur një kontraktor dhe kontrata do të nënshkruhet zyrtarisht të hënën. Ne presim që puna në atë seksion të fillojë këtë muaj, kështu që edhe kjo, do të thoja, po zgjidhet ky lloj trashëgimie negative nga e kaluara. Ka mijëra probleme me të cilat jemi përballur. Po i zgjidhim një nga një. Nuk mund t’i zgjidhim të gjitha njëherësh sepse nuk kemi mjaftueshëm burime, por po i zgjidhim një nga një. Një nga prioritetet që kemi arritur të zgjidhim është pikërisht kjo sfidë për të përfunduar më në fund këtë segment, këto tetë kilometra”, theksoi Mickoski.
