Irani nuk pritet ta hapë së shpejti Ngushticën e Hormuzit, ja kush e thotë

Raportet e fundit nga shërbimet amerikane të inteligjencës paralajmërojnë se Irani me gjasë nuk do ta hapë së shpejti Ngushticën e Hormuzit, pasi kontrolli mbi këtë korridor kyç për naftën botërore i jep një avantazh të rëndësishëm ndaj Shteteve të Bashkuara, kanë deklaruar për Reuters tre burime të njohura me çështjen. Të dhënat e inteligjencës sugjerojnë se Teherani mund të vazhdojë ta bllokojë Ngushticën e Hormuzit për të mbajtur çmimet e energjisë të larta dhe për të ushtruar presion ndaj presidentit amerikan Donald Trump që të gjejë një zgjidhje të shpejtë për luftën gati pesëjavore, e cila mbetet jopopullore tek votuesit amerikanë.
Raportet gjithashtu sugjerojnë se lufta, e cila kishte si qëllim dobësimin e fuqisë ushtarake të Iranit, në fakt mund të çojë në rritjen e ndikimit të tij rajonal, duke demonstruar aftësinë e Teheranit për të kërcënuar një nga kalimet më të rëndësishme strategjike në botë.