Një rast i dhunës në familje është iniciuar në Prishtinë, ku një grua dyshohet se ka pësuar lëndime trupore pasi u sulmua fizikisht nga djali i saj, mëson ekskluzivisht Gazeta Sinjali.
Sipas burimeve të Sinjalit, rasti dyshohet se ka ndodhur më 4 maj, rreth orës 12:05, në rrugën “Gëzim Redenica” në Prishtinë, ndërsa është iniciuar më 23 qershor në Sektorin Qendër.
Burimet bëjnë të ditur se ankuesja ka deklaruar se djali i saj dyshohet se e kishte shtyrë, me ç’rast ajo kishte pësuar lëndime trupore, përkatësisht thyerje të këmbës.
Viktima ka pranuar trajtim mjekësor për lëndimet e shkaktuara.
I dyshuari është intervistuar në prani të avokatit mbrojtës sipas detyrës zyrtare, ku dyshohet se ka mohuar ta ketë sulmuar fizikisht ankuesen.
Lidhur me rastin është njoftuar Prokurori kujdestar, me udhëzim të të cilit rasti është iniciuar si “Dhunë në familje” dhe “Lëndim trupor”.
Ndaj të dyshuarit është lëshuar vendim për ndalim, ndërsa për rastin janë njoftuar edhe Njësia për Mbrojtjen e Viktimave dhe Qendra për Punë Sociale.
