Detaje të reja nga vr’asja e mbrëmshme. 40-vjeçari u qëllua me shtatë plumba pranë banesës së tij, ja detajet

Kanë dalë detaje të reja nga vrasja e ndodhur mbrëmjen e së enjtes në lagjen “Erdogan” të Laçit, ku mbeti i vrarë Ilir Gjini, 40 vjeç, i njohur edhe me mbiemrat Kokaj, Lika dhe Nure. Sipas burimeve hetimore, ai sapo kishte parkuar automjetin dhe po shkonte drejt hyrjes së pallatit ku banonte, kur u qëllua me shtatë plumba. Edhe pse tentoi të largohej, autori i dyshuar e ndoqi dhe e qëlloi sërish pranë hyrjes së godinës, duke i shkaktuar plagë fatale.
I plagosur rëndë, 40-vjeçari u dërgua me urgjencë drejt Spitalit të Traumës, por humbi jetën gjatë transportit. Policia ka identifikuar dhe ka shpallur në kërkim si autor të dyshuar Artur Sutin, i cili dyshohet se u largua menjëherë pas krimit.
Sipas hetimeve paraprake, viktima dhe autori i dyshuar ishin fqinj, pasi banonin në të njëjtën lagje. Në kuadër të operacionit janë shoqëruar në komisariat nëna dhe vëllai i autorit të dyshuar, ndërsa vijojnë kontrollet për kapjen e tij.