Kryetari i Komunës së Tearcës, Daut Memishi, ka zhvilluar takim me Ministrin e Mjedisit Jetësor dhe Planifikimit Hapësinor, Muhamet Hoxha, ku kanë diskutuar për projektet aktuale dhe mundësitë për thellimin e bashkëpunimit ndërinstitucional.
Sipas Memishit, gjatë takimit janë diskutuar prioritetet zhvillimore të Komunës së Tearcës, me fokus të veçantë në realizimin e projekteve infrastrukturore të qëndrueshme.
“Shpreha mirënjohjen për gatishmërinë e Ministrisë për të mbështetur komunën tonë”, ka shkruar Memishi pas takimit.
Ai bëri të ditur se është dakorduar që bashkëpunimi ndërmjet Komunës së Tearcës dhe Ministrisë të vazhdojë edhe në periudhën e ardhshme, me qëllim sigurimin e mbështetjes financiare dhe teknike për realizimin e investimeve kapitale. Sipas kryetarit Memishi, synimi është që projektet të realizohen sa më shpejt dhe të jenë në funksion të përmirësimit të kushteve për qytetarët e Komunës së Tearcës.
