Publicisti Azam Dauti ka vlerësuar mbrëmjen artistike në Shkup me pjesëmarrjen e sopranos së njohur shqiptare Inva Mula dhe artistes Dëshira Ahmeti, duke e cilësuar atë si një dëshmi se kryeqyteti vazhdon të mbetet një nga qendrat më të rëndësishme të kulturës shqiptare.
Në një status të publikuar në rrjetet sociale, Dauti shkruan se, me zërin e Inva Mulës, artin e Dëshira Ahmetit dhe praninë e miqve të tyre, Shkupi “po ndriçon nga një tjetër dritë: ajo e muzikës, e kulturës dhe e artit të madh”.
Sipas tij, qyteti ku “gurët e vjetër kanë ruajtur zërat e brezave” dhe ku Çarshia ka bartur histori shekullore, rikthehet përmes muzikës në vendin që i takon, si një qendër e rëndësishme e kulturës shqiptare.
“Shkupi nuk është vetëm një hapësirë gjeografike. Shkupi është kujtesë, është kulturë, është art, është shpirt”, thekson Dauti, duke shtuar se kur emra të mëdhenj si Inva Mula bashkohen me artistët shqiptarë, madhështia e qytetit dëshmohet përmes artit.
Ai e përmbyll mesazhin e tij duke theksuar se Shkupi ka qenë gjithmonë një nga zemrat e kulturës shqiptare dhe se “sonte, kjo zemër rreh në ritmin e muzikës”.
