Parku i Qendrës për Kulturë në Tetovë është shndërruar ditën e djeshme në një hapësirë mbresëlënëse arti, ku fëmijët dhe të rinjtë kanë pasur mundësinë të shfaqin talentin e tyre përmes ngjyrave dhe furçave, në kuadër të aktiviteteve festive të manifestimit “Tetova n’Festë”.
Nën udhëheqjen e përkushtuar të koordinatorit të projektit, Prof. Kujtim Ameti, si dhe profesorëve Arbnora Huseini dhe Enesa Memeti, fëmijët janë orientuar hap pas hapi në procesin e pikturimit. Ky bashkëpunim ka mundësuar që parku të kthehet në një galeri të hapur, ku vizitorët patën rastin të shijojnë krijimtarinë dhe imagjinatën e pakufijshme të brezit të ri.
Organizatorët kanë vënë në pah rëndësinë e mbështetjes së talenteve të reja, duke shprehur një falënderim të veçantë për nxënësit pjesëmarrës.
Aktiviteti u përmbyll në një atmosferë festive, e cila solli shumë art, ngjyra dhe buzëqeshje si për pjesëmarrësit, ashtu edhe për qytetarët e pranishëm, duke lënë pas një kujtim të bukur kulturor për qytetin e Tetovës.
