Salvatore Aliu i kërkuar nga drejtësia shqiptare për pjesëmarrje në organizata kriminale dhe i konsideruar si një prej bosave më të mëdhenj të trafikut të kokainës, është arrestuar në Rusi.
Aliu, emri i vërtetë i të cilit është Shpëtim, kërkohet nga SPAK me akuzat për pastrimin e parave të siguruara nga trafiku ndërkombëtar i kokainës. Ai dyshohet se ka arritur të pastrojë deri në 30 milionë euro në Shqipëri, përmes bizneseve dhe blerjes së pasurive të paluajtshme.
I njohur edhe me pseudonimet “Daja”, “Qero” dhe “Qerosi”, Aliu dyshohet se ka pasur rol në organizimin dhe financimin e trafikut të kokainës nga Ekuadori drejt vendeve të Bashkimit Europian dhe Shqipërisë.
Emri i tij doli në skenë pas zbërthimit të aplikacionit të koduad “Sky ECC”, ku udhëzonte vëllain e tij Isa Aliu se si të fshihte në fuçi dhe më pas të pastronte shumat e mëdha të parave të drogës, në një rast 6 milionë euro.
Aliu dyshohet se ka arritur të fusë plot 50 tonë kokainë në Europë, nga të cilat janë provuar 5 episode të trafikimit të kokainës në sasi të mëdha dhe janë sekuestruar rreth 9 tonë.
SPAK ka vënë nën sekuestro plot 491 pasuri të grupit kriminal të Aliut, ndër to hotele, apartamente, toka dhe vila luksoze nga Elbasani në Tiranë, Durrës dhe Dhërmi, vlera e të cilave llogaritet se i kalon 150 milionë euro.
