Biznesmeni nga Tetova humbi mijëra denarë nga një mashtrim, ja detajet

Në Tetovë është raportuar një rast serioz i mashtrimit në internet, ku një 32-vjeçar, menaxher i një kompanie, është dëmtuar për 175.275 denarë pasi është mashtruar të kryejë pagesë në një llogari të rreme përmes komunikimit elektronik.
Sipas informacioneve nga SPB Tetovë, rasti ka nisur më 6 mars kur denoncuesi ka pranuar një email nga një adresë që dukej shumë e ngjashme me adresën e partnerit të tij afarist nga jashtë vendit. Në mesazh ishte bashkëngjitur edhe një profaturë, gjë që e ka rritur besimin se komunikimi ishte i ligjshëm.
Pa dyshuar në vërtetësinë e emailit, ai e ka realizuar pagesën në llogarinë e treguar në mesazh. Mashtrimi është zbuluar vetëm më 5 maj, gjatë një bisede telefonike me partnerin e vërtetë afarist, ku është konstatuar se ai asnjëherë nuk e kishte dërguar faturën dhe se paratë ishin transferuar në një llogari të rreme.
Pasi e ka kuptuar situatën, rasti është paraqitur në polici, e cila tani po ndërmerr masa për zbardhjen e plotë të rastit dhe identifikimin e autorëve.
Ky rast edhe njëherë tregon rrezikun nga mashtrimet e njohura si “business email compromise”, ku sulmuesit përdorin adresa të rreme elektronike për të mashtruar kompanitë dhe për të përfituar transfere financiare.