Nita Kaprolli është një nga figurat më të spikatura shqiptare në fushën e teknologjisë, shkencës dhe inteligjencës artificiale, një histori suksesi që nis në Maqedoni dhe vazhdon sot në Shtetet e Bashkuara të Amerikës.
E lindur dhe e rritur në Gostivar, Kaprolli u dallua që në moshë të hershme për talentin dhe përkushtimin e saj të jashtëzakonshëm në arsim. Arsimin fillor dhe të mesëm e përfundoi për vetëm 10 vite, duke u avancuar dy herë dhe duke mbyllur nga dy vite shkollimi në një, fillimisht në arsimin fillor dhe më pas në atë të mesëm.
Rruga e saj akademike vijoi me ritëm po aq mbresëlënës. Ajo ndoqi paralelisht dy drejtime universitare, duke u diplomuar në Inxhinieri Kompjuterike, si dhe si profesoreshë e Matematikës dhe Informatikës. Studimet master i përfundoi në fushën “Software Application and Development”, ndërsa më pas vazhdoi specializimin post-magjistraturë në Massachusetts Institute of Technology (MIT), një nga universitetet më prestigjioze në botë për teknologji informatike.
Në MIT, në programin “Applied Data Science – Leverage AI”, nën udhëheqjen e profesorit John Tsitsiklis, ajo u dallua me një mesatare prej 97 për qind, duke konfirmuar edhe një herë nivelin e saj të lartë profesional dhe akademik.
Talenti i saj është shfaqur që në fëmijëri, ku për vetëm tre vite fitoi 16 çmime në nivele komunale, republikane dhe ndërkombëtare, në fusha shkencore dhe në artin e të shkruarit. Në matematikë, ajo arriti vendin e dytë në gara republikane, ndërsa gjatë studimeve universitare, në vitin e tretë, u shpall oratorja më e mirë ndër të gjitha universitetet shtetërore dhe private.
Përveç shkencës, Kaprolli ka kultivuar edhe talentin artistik. Ajo nisi të shkruajë në moshën 11-vjeçare dhe është autore e librit “Po vij”, i financuar nga Ministria e Kulturës, si një poete e dalluar. Gjithashtu, ka drejtuar disa emisione televizive, ndër to edhe emisionin për fëmijë “Cicerimat e para”, për tre vite me radhë.
Karriera e saj profesionale përfshin edhe gazetarinë, ku ka punuar si gazetare dhe kolumniste, si dhe është vlerësuar me çmimin e parë në nivel kombëtar për autorësinë e emisionit “Sofra kulturore”.
Në moshën 23-vjeçare, ajo u shpërngul në Shtetet e Bashkuara të Amerikës, ku karriera e saj mori përmasa ndërkombëtare. Fillimisht u angazhua si Data Scientist në Managed Healthcare Associates, pjesë e Roper Technologies, një nga organizatat më të mëdha GPO në SHBA.
Falë projekteve të suksesshme në automatizim dhe inteligjencë artificiale, në vitin 2025 u nderua me Çmimin Presidencial, një nga vlerësimet më prestigjioze të kompanisë.
Aktualisht, Nita Kaprolli drejton departamentin e automatizimit, që përfshin gjashtë departamente, ku udhëheq transformimin teknologjik dhe optimizimin e proceseve, duke kontribuar drejtpërdrejt në rritjen e të ardhurave dhe performancës organizative.
Në planin akademik, ajo ka publikuar edhe punime shkencore në fushën e machine learning, përfshirë studimin mbi parashikimin e demencës, ndërsa aktualisht po punon në një tjetër projekt kërkimor njëvjeçar të financuar nga Roper Technologies.
Paralelisht, ajo shërben si ligjëruese në King’s College, në departamentin e CSI, ku ligjëron lëndën “Programim i avancuar” dhe mbështet studentët në certifikim dhe integrim në tregun ndërkombëtar të punës.
Vizioni i saj mbetet i qartë: të mbështesë studentët shqiptarë në rrugën drejt universiteteve prestigjioze të Ivy League, të krijojë një inkubator teknologjik dhe të kontribuojë në integrimin profesional të tyre në SHBA.
Historia e Nita Kaprollit është dëshmi se përkushtimi, talenti dhe puna e palodhur mund të çojnë një vajzë shqiptare nga bankat e shkollës në Maqedoni drejt majave të teknologjisë botërore.
