Dy raste të ndara të dhunës në familje janë raportuar në Shkup, ku zyrtarët policorë kanë vepruar pas denoncimeve për sulme fizike ndaj nënave, njofton Ministria e Punëve të Brendshme. Në rastin e parë, më 4 gusht rreth orës 23:40, zyrtarët policorë të SPB Shkup e privuan nga liria V.N. (22) nga rrethina e Shkupit, pasi ishte raportuar se po atë ditë, rreth orës 21:00, në shtëpinë familjare kishte sulmuar fizikisht nënën e tij 55-vjeçare.
Në rastin e dytë, po atë ditë rreth orës 17:40, në Stacionin Policor të Draçevës u zhvillua një bisedë zyrtare me M.A. (42) nga Shkupi, pas një denoncimi se në banesë kishte sulmuar fizikisht nënën e saj 73-vjeçare.
Nga SPB Shkup bëjnë të ditur se, pas dokumentimit të plotë të të dy rasteve, do të ngrihen kallëzimet përkatëse ndaj personave të përfshirë.
