Shenki Versace lirohet nga paraburgimi, gjykata i cakton masa kujdesi

Shenasi Mislani, i njohur në opinion si Shenki Versace, do të lirohet nga paraburgimi, mësohet nga burime të Gjykatës Penale.
Sipas informacioneve, gjykata ka vendosur që masën e paraburgimit t’ia zëvendësojë me masa kujdesi. Mislanit i është caktuar detyrimi që rregullisht të paraqitet në gjykatë, ndërsa i është konfiskuar edhe pasaporta për të parandaluar arratisjen e mundshme.
Ai ndodhej në paraburgim që nga dhjetori i vitit 2024.
Ndërkohë, vëllai i tij, Mirvet Mislani, vazhdon të mbetet në paraburgim.
Shenasi Mislani është një nga të akuzuarit në rastin kundër grupit kriminal “Bellanoca-Baron”, ku Prokuroria i ngarkon të pandehurit me disa vepra të rënda penale, përfshirë organizim kriminal, vrasje, zhvatje, kërcënime dhe djegie të objekteve e automjeteve.
Në seancën e mbajtur në shtator të vitit të kaluar në burgun e Idrizovës, të akuzuarit deklaruan se nuk ndihen fajtorë për veprat që u vihen në barrë.
Përveç vëllezërve Mislani, në bankën e të akuzuarve ndodhen edhe Reshat Ismani, Abdulla Sadiki dhe Akif Memishi.