Pjesëtarët e Ministrisë së Punëve të Brendshme të Serbisë, në bashkëpunim me policinë kufitare të Maqedonisë së Veriut, kanë arrestuar S.K. (56), shtetas të Maqedonisë së Veriut, i cili dyshohet se është paraqitur rrejshëm si mjek dhe ka mashtruar qytetarë për të marrë para.
Sipas hetimeve, nga 4 deri më 13 qershor të këtij viti, ai ka telefonuar tre qytetarë nga zona e Vranjës, duke u prezantuar si mjek nga Maqedonia. Ai u ka thënë se anëtarë të afërt të familjeve të tyre ishin plagosur rëndë dhe se nevojiteshin para për trajtim mjekësor urgjent, duke i vënë në lajthitje.
Më pas, i dyshuari dyshohet se ka shkuar personalisht në adresat e viktimave dhe ka marrë prej tyre shuma të konsiderueshme parash.
Me urdhër të Prokurorisë Themelore Publike në Vranjë, atij i është caktuar masa e ndalimit prej 48 orësh nën dyshimin për veprën penale të mashtrimit të vazhdueshëm. Pas përfundimit të procedurave, ai do të paraqitet para prokurorisë kompetente së bashku me kallëzimin penal.
