Deklaratat e kreut të LSH-së, Ziadin Sela, të bëra mbrëmjen e së enjtes në podcastin “Rrishtazi” të gazetës KOHA, kanë nxitur reagime dhe komente të shumta në rrjetet sociale, për shkak të gjuhës së ashpër dhe etiketimeve fyese të përdorura ndaj koalicionit VLEN në kontekstin e diskutimeve për mundësinë e përfshirjes së tij në qeveri, shkruan Tema.mk.
Gjatë intervistës, Sela përdori shprehje si “të pafytyrë”, “mashtrues” dhe “pjellë”, duke e zhvendosur debatin nga argumentet politike drejt sulmeve personale. Kjo gjuhë është kritikuar nga shumë qytetarë në rrjetet sociale, të cilët vlerësojnë se një diskurs i tillë nuk kontribuon në kulturën demokratike dhe as në ngritjen e nivelit të debatit publik.
Në komentet e publikuara online, një pjesë e opinionit e ka krahasuar retorikën e Selës me stilin politik që për vite me radhë e karakterizonte Menduh Thaçi, të cilin shpesh e kanë cilësuar si mentorin e tij politik. Sipas këtyre reagimeve, përdorimi i fjalorit ofendues dhe etiketues rikthen një model komunikimi që qytetarët kanë pritur ta lënë pas. Pavarësisht dallimeve politike dhe përplasjeve mes partive, opinioni publik pret që përfaqësuesit politikë të konkurrojnë me ide, programe dhe argumente, e jo me sharje dhe etiketime. Skenës politike shqiptare dhe asaj në vend në përgjithësi nuk i nevojitet fjalor rruge apo gjuhë fyese, por debat i përgjegjshëm që respekton qytetarët dhe standardet e komunikimit publik./Tema.mk/
