Masat e reja qeveritare për uljen e çmimeve të karburanteve do të hyjnë në fuqi sot në mesnatë, me ç’rast nafta do të shitet me të njëjtin çmim, ndërsa benzina do të jetë më e lirë për dy denarë për litër. Këtë e njoftoi kryeministri Hristijan Mickoski pas seancës së jashtëzakonshme të djeshme qeveritare. Qeveria ka vendosur të ulë akcizën për naftën me katër denarë dhe për benzinën me dy denarë. Paralelisht, masa për uljen e normës së TVSH-së për karburantet nga 18 në 10 përqind vazhdon, ndërsa është arritur një marrëveshje me kompaninë OKTA për të vazhduar zbritjen shtesë – dy denarë për benzinë dhe tre denarë për naftë, të paktën deri në fund të prillit.
Sipas Mickoskit, masat synojnë të lehtësojnë presionin e çmimeve mbi qytetarët dhe të ruajnë standardet e jetesës. Ai theksoi se pavarësisht kërkesës së rritur ndjeshëm – veçanërisht në rajonet kufitare, ku është regjistruar një rritje trefish – për momentin nuk ka nevojë të kufizohen sasitë e blera nga qytetarët e huaj. Në rast se kriza vazhdon, Qeveria po shqyrton ndërhyrje shtesë, duke përfshirë uljen e TVSH-së për produktet ushqimore bazë nga 5% në zero, si dhe riaktivizimin e masës së ngrirjes së marzhit. Po shqyrtohet mundësia që efektet e një mase të tillë të zgjasin edhe pas heqjes së saj formale, me qëllim parandalimin e një rritjeje të ndjeshme të çmimeve.
